قبل شهر تونس الناس الكل تحكي كورة ،فيراج،سهرية ،مغني عمل ،ممثلة نفخت شفايفها من غير تعميم بالطبع...توا الناس الكل ولات تحكي سياسة ...هذا أمر طبيعي خاطر وضع البلاد يفرض هذا و زيد كل مواطن يحب يعمل حاجة ينفع بها بلادو ...و رنا بكلنا توانسة و كلنا نحبو تونس و يزينا من لغة التشكيك و المتاجرة بالوطنية (انتي ما تحبش تونس ..أنا وطني و إنت لا ...إنت جبان ..إنت قفاف ) ما علينا هذي نقاشات بيزنطية تعود بها التونسي في مواضيع الكورة
باهي نحب نقول إلى أي واحد : قبل ما تتظاهر و تعبر و تشانعها و تسب فلان و تشكك في فلتان ... خممتش انّك...تفكّر؟
قبل ما تتمنيك على الناس إلي مشات من سيدي بوزيد الى القصبة و تقول عليهم نزوح...هاذم ناس مشات طالب بحقوقها و عندهم الحق في هذا كما أي تونسي آخر
خممتش تحطّ روحك في بلاصتهم ؟
خممتش نهار تحس باش قاعد يحس فيه مظلوم ...خوه تقتل بالكرطوش على خاطر يلوج على الخبزة إلي تحرم منها مع عائلته ؟
خممتش تخاف عليهم و تحاول تحميهم و تنبهو من ناس تحب تستغلهم لمصالحها السياسية ؟
ما نتصورش على خاطر ما يحس الجمرة كان إلي يعفس عليها
قبل ما تقول :أنا ضد الحكومة المؤقته كلياً ....وإلا أنا مع الحكومة المؤقتة و نفضل بقائها ....وإلا أنا مع تعديل الحكومة المؤقتة بإنسحاب بعض الوزراء
شبيك ما سئلتش روحك : علاش أنا نساند في فلان؟ وعلاش نسبّ و نشتم في فلتان؟
قبل ما تقول راني ضد الخوانجية و النهضة
عملتش بحث في الأنترنت على الغنوشي ؟ سئلتش ناس تعرفوا و عندك فيهم ثقة و ما يفكروش كما يقلهم بن علي؟ حبيتش تعرف أفكار الغنوشي ؟قريتلوش كتابتو ؟
ما نتصورش
قبل ما تقول نخاف على الإسلام من المرزوقي و تسب فيه
تعرفو؟بحثتش عليه؟عرفت تاريخ حياتو؟ قريتلو؟...تعرف أفكارو؟
تعرف إلي الدكتور طارق رمضان إلي يعتبر سفير الإسلام في أوروبا شكروا و قال فيه كلام باهي ؟
زعمة السيد هذا بالحق باش يضر تونس بعد ما تفنى و شد الحبس على خطرها ؟
باهي شبيك ما خممتش و قلت :علاش عبد الوهاب بن عبد الله و بن ضياء في اقامة جبرية ؟
شابهم مش في التّحقيق؟
زعمة طلعوا منها سلامات لحكاية كيف برشة غيرهم خدموا في التجمع قبل ؟ ما عندهم حتى دخل ؟
علاش الإعلام ركز على املاك الطّرابلسية و الماطري؟
زعمة مازال الإتّحاد العام التونسي للشغل يعكس نبض العمّال؟
علاش العباد نسات عبد السلام جراد الذي أمضى على بيع القطاع العام و قطع الأرزاق في إطار ما سمي التأهيل الشامل بصحبة زمرة الإرتشاء داخل الإتحاد و هو الذي زكّى بن علي أيضا ؟
زعمة جراد و اتبع تابوا و ولو ملايكة ؟
زعمة السرقة في تونس عملها و غطى عليها الغنوشي ؟ مالا شبيه يسكن في عمارة و اولدو ناس عادية ؟ و شبيه زادة قعد عشرة سنين وزير أول ؟
و علاش البوليسية قالو انّهم أبرياء من دم الشّهداء و تعدّات في الغمّة؟
شبي الحرس الرّئاسي قالو انّهم مظلومين من السّرياطي و تعدّات؟
تعرفوه السّرياطي قبل؟...و زعمة هو المذنب ولاّ هو زادة ضحية بن علي إلي أجبرو على الاوامر؟
علاش وزارة العدالة ما تتهمش بن علي بقتل الأرواح البريئة و تقتيل المواطنين ؟
شبي الطاهر بلخوجة في التّلفزة (مؤسس البوب في تونس) ولاّ ملايكة في نسمة ورمى فساد الدّاخلية بكلو على بن علي؟
زعمة فما خطر خارجي؟ياخي أمريكا و فرنسا و إسرائيل باش يقعدوا فراجة؟...مش باش يحفروا؟
و علاش فما أزمة ثقة كبيرة في تونس ؟ شكون السبب في هذا ؟ و شنوا ربحو؟
تي هاو طلع فما برشة اسئلة و مازال برشة منها...أنا ما نجمش نجاوب عليهم الكل على خاطرني مواطن عادي لكن هاني نحاول باش نفهم و ما نتسرعش في الحكم... إنت زادة قبل ما تبدا تعيط وتصيح جاوب على الأقل على الاسألة هذي ومبعد ناشد إلي تحب و عارض إلي تحب ...اسئال أهل الذكر ...بربش في الأنترنات حاول باش تفهم ...كان حسيتها صعيبة عليك أقعد فراج خير ... مش عيب كيف ما تعرفش أما العيب انّك تعيّط وتصيح و انت تعرف انّك ما تعرفش شي...تبدى عامل كيف المعيز تبع في غيرك ...هاني معاكم لا تنساوني
Articles
4 commentaires:
كما يقولوا في العجلة الندامة،ما لازمش نتسرعوا، لازمنا نفكروا و نفكروا قبل أي خطوة
très intéressant tout ça mais la majorité ne comprenne rien!!!!!
Brabi mé tensawech ili rahi notre tunisie w trabha agla min arwe7na 5amamou chwaya yehdikom!!!!
eli 3ala 5atir chwaya amn ydhayi3 el7oreya ,insen lé yest7a9 lé el7oreya lé elamn
mélékhér échkoun insad9ou brabby??????
win la79i9a?énnajém éna wa7dy nal9aha?????
wkén l9ytha échkoun 9al illy hédhy hya la79y9a éss7i7a......
wallah ét9oulich 3lya nitfaréj fi X FILES!!!!!
Enregistrer un commentaire
في انتظار تعاليقكم
J'attend vos commentaires