الشعب التونسي يلوج على الخبزة يا نسمة مش على الكالسون




لحقيقة عندي مدة ما قعدتش قدام التلفزة عاد قلت خلي نعمل طلة فماش ما نلقى حاجة جديدة تبدلت ...عاد بديت ندور من قناة إلى قناة مباعد قلت خلي نشوف القنوات التونسية و القنوات إلي متابعينهم التوانسة بصفة خاصة...حطيت قناة نسمة الإيطا-تونسية ، بالزهر نلقاهم عملين برنامج يحكي على الوضع في سيدي بوزيد "إيه والله حاجة باهية!!!...إسمع ها سيدك  نسمة نيوز"
لحقيقة عجبتني لحكاية قلت على القليلة الإعلام الموجة للشعب التونسي بدا يفيق على وضعو المتخلف...بديت نسمع فاهم فاش يحكيوا...لقيت إلي ولا فما نوع من الجرأة في النقاشات هذي زادة نقطة باهية و تعمل الكيف ...يا أخي كفانا من اللغة الخشبية ...و تجبد مشكل الرشوة و التقسيم الخاطئ للثروات في تونس و تقاعص بعض المسؤولين عن مسؤلياتهم و العديد من النقاط الأخرى الهامة...وليت متعجب و نقول ياخي هذي نسمة إلي الشعب التونسي ديمة يتشكى منها؟ بديت نثبت قلت بالك قناة أخرى ههه...و زادة حكاو على ضرورة النهوض بالإعلام التونسي و إستعرفوا بيه متخلف بطريقة غير مباشرة و قالوا إلي يلزموا يتحط في متحف ههه و إلي هوا مازال يمارس في "البروباغندة" و إلي أنها سياسة قديمة تحاول باش تؤثر على الرأي العام
لحقيقة كلام ياسر حلو و يعمل الكيف ...و مباعد طرحوا الحل إلي كنت حكيت عليه في مقال آخر و إلي انو يجب النهوض بقطع الإعلام في تونس إلي فشل في تحليل مشاكل المواطن التونسي و إكتفى باللغة الخشبية...و فجأة ولات فما مطالبة بالمساندة ليهم بش يدافعوا على مكاسب المرأة في تونس و حقوق و حرية المرأة و لوبانة الـعادة و العوايد متع نسمة و رجعولنا للمعبوكة...يا نسمة المرأة لباس عليها في تونس ؟ توا الشعب في سيدي بوزيد ما لقاش الخبز و انتوما تحكيو على حرية المرأة...توا يا ناس هذا معقول ؟
و زيد على هذا يطلع فجأة واحد مش عرف منين جابوه قال تونس تتعرض لمؤامرة متع خوانجية ...توا يا ناس هذا كلام واحد يتعدى في التلفزة و هذي أفكار يخاطب بها الشعب التونسي ....يا أخي وين يرى فيهم الخوانجية في تونس؟ توا هذا كلام يا ربي ...تقول في روضة صغار يرميو في الكلام هكاك  
ما تستغربوش كان حكاو على مغني الراب بسيكو-م في نسمة و يقولوا هذا غناء خوانجية؟ مع انو ما فما حتى علاقة بين الراب و الخوانجية

الحاصل ما فماش قطوس يصطاد إلى ربي و طلعت نسمة وفية لتقليدها و ديمة تخبي في السم مدسوس في العسل للشعب التونسي و تدافع على الكلسون بكل شجاعة و متناسية المشاكل الحقيقية للتونسي من فقر و
بطالة و ضلم 

2 commentaires:

Anonyme a dit…
Ce commentaire a été supprimé par un administrateur du blog.
Unknown a dit…

إللي فيه طبة ما تتخبة

Enregistrer un commentaire

في انتظار تعاليقكم
J'attend vos commentaires

Newer Posts Older Posts